Saturday, October 14, 2017

Mshindi wa Singeli Michano ya EFM Mwanza apatikana

>
Watanzania jana waliadhimisha kumbukizi ya miaka 18 tangu kufariki dunia kwa mwasisi wa taifa la Tanzania, Hayati Mwl.Julius Kambarage Nyerere aliyefariki dunia Oktoba 14,1999 akiwa nchini Uingereza kwa ajili ya matibabu.

Lakini wakati huo huo katika uwanja wa CCM Kirumba Jijini Mwanza, uliofunguliwa na Mwl.Nyerere mwaka 03.02.1980 kulifanyika tamasha la Mziki Mnene lililoandaliwa na EFM & ETV za Dar es salaam.

Katika tamasha hilo kuna matukio muhimu yaliyofanyika ambapo asubuhi ilianza na mazoezi ya viuongo (Jogging) pamoja na kumsaka mkali wa muziki wa Singeli yaani "Singeli Michano" . Mchana kulikuwa na mchezo wa soka baina ya kikosi cha EFM&ETV na timu ya Mwanza Veteran na jioni hadi kuchee ilifanyika burudani kutoka kwa wasanii mbalimbali.

BMG imekusogezea mshindi wa Singeli Michano Mwanza #Live kutoka uwanja wa CCM Kirumba ambako tamasha hilo lililodhaminiwa na wadhamini kadhaa ikiwemo Biko, Cocacola na JB Fairmont Hotel.
 
Habari imeandaliwa na BMG Habari, Pamoja Daima!

Friday, August 11, 2017

JUDITH KIULA MUIMBAJI MPYA WA GOSPEL

Judith Kiula ni mwenyeji wa Singida aliyezaliwa na kukulia Morogoro,  alizaliwa Kizuka hospital, na akaanza shule Kizuka primary school, akajiunga na
Tumaini Lutheran seminary, baadae akajiunga Dakawa High School na kisha Institute of finance Management.
Judith alianza kuimba tangu akiwa mdogo wakati wa Sunday school na katika kwaya mbali mbali za mashule nk.Kwa mara ya kwanza alirecord wimbo mwaka 2011 lakini haukupokelewa vizuri, na sasa amerudi tena na anatarajia kukamilisha album yake yenye nyimbo 8 kabla ya mwisho wa mwaka huu. Ila kwa sasa yuko tayari kukaribishwa kwenye maonyesho ya muziki wa Gospel popote pale. Sikiliza hapa uwezo wake

Tuesday, August 8, 2017

UPANGA ILIWAHI KUITWA SOULVILLE


KATIKA  miaka ya 60 na 70 mpaka 80, karibu kila eneo la jiji la Dar es Salaam kulikuwa na makundi ya muziki. Wakati huo muziki ulifanywa kwa makundi tofauti na sasa ambapo msanii anaweza kuwa peke yake  katika kutunga, kurekodi na hata kufanya kazi yake jukwaani.  Muziki wa dansi uligawanyika katika makundi makubwa mawili, makundi yaliyopiga muziki wa rhumba na yale yaliyopiga muziki wa magharibi. Kulikuwa na ushindani mkubwa sana kati ya makundi haya kila mtaa ukijitahidi  kupiga muziki bora zaidi ya mwingine. Hata wazazi nao walijihusisha kuchangia ufanisi wa vikundi vya watoto wao, kwa kuwanunulia vyombo vya muziki na kuwapa maeneo ya kufanyia mazoezi. Kulikuwa na ushindani mkubwa sana kati ya vikundi vya muziki kutoka Kurasini na Chang’ombe na vikundi ambavyo vilitoka Upanga. Ukiliangalia eneo la Upanga leo huwezi kudhani kuwa lilikuwa eneo muhimu sana katika shughuli za muziki wa vijana, lakini hakika eneo hili lilikuwa na vikundi kadhaa vilivyokuwa na wanamuziki kutoka ambao wengi walikuwa ni watoto wa Upanga na wenzao ambao walijiunga nao wakitoka mitaa mingine. Upanga ni eneo muhimu sana katika historia ya muziki Tanzania. Enzi hizo vijana walipagawa na muziki wa soul, muziki ambao asili yake ilikuwa Marekani, muziki ambao uliporomoshwa na wanamuziki kama Otis Redding, Percy Sledge, Sam Cooke, James Brown, Clarence Carter, Wilson Pickett, Aretha Franklin na wengi wengine. Vikundi vingi vya muziki vya vijana wa Upanga, waliiga na kupiga muziki huu, na hata kuamua kupaita upanga, Soulville.

Kwenye kona ya barabara ya Mindu na United Nations, nyumbani kwa familia ya Jengo, hapo ndipo palikuwa mahala pa mazoezi pa kundi moja maarufu lililoitwa Groove Makers. Baadhi ya wanamuziki wa kundi hili walikuwa Mohamed Maharage, Joseph Jengo na nduguye Emmanuel Jengo, Herbert Lukindo, Willy Makame, na mpiga Drums ambae mpaka leo yupo katika anga za muziki Habib Jeff mwanamuziki ambaye toka amejiunga Mlimani Park miaka ya 70 hajawahi kuhama kundi hilo. Kundi jingine maarufu pale Upanga lilikuwa The Strokers, hili lilikuwa na awamu mbili, awamu ya kwanza ilikuwa na wanamuziki akina Donald Max, David Max, Harry Chopeta, Vincet Chopeta, Pino Makame na Ochiwa na Freddy Lukindo.

Awamu ya pili ya kundi hili lilkuwa na Sajula Lukindo,Onesmo Kibira,Innocent Galinoma,Ben Galinoma, Denis Pad, Francis Kasambala,Vicent na Harry Chopeta, Ally Mwarabu, Sabri Mmanga na wengineo. The Barlocks ni bendi nyingine iliyochipukia Upanga, jina la Barlocks lilitokana na kuweko kwa kundi jingine lililojiita la The Barkeys, kundi ambalo lipo hai mpaka leo ambalo kwa sasa linajulikana kwa jina la The Tanzanites, lililo chini ya Abraham Kapinga. The Barlocks walikuwa wakitumia vyombo vya Barkeys kwani kwa wakati huo bendi hizi zilikuwa kama mkubwa na mdogo. Zamani lilikuwa jambo la kawaida kabisa bendi kuwa na makundi mawili A na B, Dar es Salaam  Jazz Band enzi za Michael Enoch, iliwahi kuwa na Dar es Salaam Jazz Band B, bendi ambayo ilikuwa na mwanamuziki maarufu Patrick Balisdya. Na bendi hii ikawa bora kiasi cha kuwa tishio kwa Dar es Salaam Jazz Band A, ikalazimika Michael Enoch amshauri mwenye bendi kulivunja kundi hilo la pili na kuwaunganisha wanamuziki pamoja, jambo lililomuudhi Patrick na kuwa sababu moja ya kuanzishwa kwa Afro 70. Barlocks hiyo ya awamu ya kwanza ilikuwa na wanamuziki akina Jimmy Jumba, Pimbi Sokoine, huyu alipewa jina la utani Pimbi kutokana na kuwa mrefu sana, Said Mbonde kaka yake Amina Mbonde aliyekuja kuwa muimbaji wa kike mzuri sana pia enzi zake, pia walikuweko Sajula Lukindo na Abraham. Kulikuweko na makundi mengine mengi hapo Upanga, kama vile White Horse, Aquarius ambako ndiko alikotoka producer maarufu Hendrico Figueredo, ambaye pamoja na wenzie walikuja kuanzisha kundi ambalo liko hai mpaka leo linaoitwa InAfrika. Wanamuziki wengine wa Upanga walikuwa akina Joe Ball, Joel De Souza, Mark De Souza, Roy Figueredo, Yustus Pereira, Mike De Souza. Kama unavyoona majina yao hawa walikuwa wengi ni Wagoa, kulikuwa na bendi nyingi za Wagoa katika miaka hiyo kwani hawa walikuwa ni Waasia wa asili ya kisiwa cha Goa, na lugha waliyotumia ilikuwa Kiingereza, hivyo muziki waliokuwa wakipiga ulikuwa wa lugha hiyo.  Baadhi ya wanamuziki niliowataja walienda na kuungana na wanamuziki wengine Arusha na kuvuma sana na kundi lililoitwa Crimson Rage, baadae wakarudi Dar na kujiita The Strange. Leo ukijidai kupiga gitaa Upanga kuna hatari ukaiyiwa polisi kwa kupigia watu kelele.

MWANAMUZIKI MPYA WA MUZIKI WA INJILI, ANA UMRI WA MIAKA 5

Baby Nito ni mtoto wa miaka mitano. Mama yake Natasha Maige Lisimo ni muimbaji wa muda mrefu anaejulikana zaidi kwa jina la Kadjanito. Huu ni wimbo wake wa kwanza akieleza anavyompenda Yesu na kumuomba amuongoze. Msikilize hapa

Sunday, July 16, 2017

RATIBA YA MSIBA NA MAZISHI YA MKE WA WAZIRI MWAKYEMBE

Mke wa mheshimiwa Waziri wa habari Utamaduni na Michezo, Dr Harrison Mwakyembe, Bi Linah Mwakyembe amefariki usiku wa kuamkia jana Jumapili, katika hospitali ya Aga Khan Dar es Salaam alikokuwa anatibiwa. Ratiba ya msiba ni kama ifuatavyo:
Jumanne 18/7/2017 asubuhi mwili wa marehemu utawasili nyumbani kwa Mhe. Dr Mwakyembe Kunduchi Beach, kisha taratibu za Ibada na kuaga zitafuata na hatimae mwili kusafirishwa kwenda Kyela zitafanyika siku hiyohiyo. Mazishi yatakuwa Kyela siku ya Jumatano
Mungu Amlaze Pema Linnah Mwakyembe

Friday, July 14, 2017

KWANINI NYIMBO ZA ZAMANI ZINA MAISHA MAREFU?

Mara nyingi sana nimeulizwa na kwanini nyimbo nyingi za zamani bado zinadumu, wakati nyimbo za siku hizi zinakuwa na umaarufu wa muda na kupotea?  Nimeshaulizwa swali hili na wapenzi wa muziki, watangazaji wa vipindi vya muziki, waandishi wa makala za muziki  na hata wanamuziki vijana wa kizazi hiki wamekuwa wananiuliza swali hili tena na tena. Labda leo nitoe tena mawazo yangu juu ya swali hilo. Kuna mambo mengi ambayo ni tofauti sana katika jamii ya watunzi sasa na watunzi wa zamani, hapa nitaongelea hali  ya watunzi wakati nikiwa katika bendi mbalimbali kati ya mwaka 1975 mpaka 1990. Tofauti ya kwanza kubwa ilikuwa ni malezi ya awali ya watunzi. Kuna msemo maarufu unaosema ‘msanii ni kioo cha jamii’. Hivyo basi ukitaka kujua jamii ikoje angalia kazi za wasanii.Tungo za miaka hiyo zinaonyesha kuwa  jamii ilikuwa na staha katika mambo mengi, jamii ilikuwa bado ni ya watu waliokuwa watoto au wajukuu wa wazee waliokuwa wanazingatia sana malezi ya kiasili, malezi yaliyosisitiza kujiheshimu na kuheshimu watu wengine. Hivyo tungo zilikuwa ni zile zilizokuwa zikijikita bado katika misingi hiyo. Jambo jingine muhimu, kulikuwa na taratibu rasmi na zisizo rasmi za kurekibisha wale waliopotoka na kukiuka misingi hii.
Kama nilivyosema nitaongelea miaka niliyokuwa katika bendi, na kwa kuwa nilipata bahati ya kuwa katika bendi ambazo nyimbo zake bado zinapendwa na hata kupigwa na bendi za sasa miaka karibu arobaini na zaidi toka tulipotunga nyimbo hizo. Jambo la kwanza ni tofauti kubwa ya sababu za kuamua kutunga, ni kawaida kabisa kusikia msanii siku hizi akiasema anataka kutunga ili’ atoke’. Au anatunga kwa kuwa ‘muziki ni biashara’. Katika utunzi wa namna hii kunakuweko la lengo linaloongoza aina ya utunzi. Hivyo mtunzi anaweza kutunga wimbo wa mapenzi lakini nia yake si kuonyesha hisia ya mapenzi bali kutengeneza wimbo ili uuze au apate umaarufu. Msanii anaweza kutunga wimbo wa msiba. Lakini hisia yake haikuwa msiba bali ni kutafuta kutoka au kutimiza amri ya kutunga wimbo wa msiba. Hisia za ukweli ni muhimu katika tungo.  Watunzi niliokuwa nikiishi na kufanya nao kazi wakati huo walikuwa wakitunga wimbo kutokana na mwongozo wa hisia zao tu. Tungo zilitokana na tukio la kweli au la kubuni lakini kilichowaongoza kutunga hakikuwa faida au umaarufu bali kutoa hisia zao kuhusu kile walichokuwa wakikielezea. Msanii ambaye anatengeneza kazi yake kwa hisia , hisia zile huambukiza kila anaesikia au kuangalia kazi ile. Wimbo ambao mtunzi kaimba kusikitika husikitisha kila anaeusikiliza,  na  ule anaouimba kufurahi hufurahisha kila anaeusikia.
Kwa kuwa muziki wakati huo ulikuwa ni mkusanyiko wa watu wengi kila tungo ilipitia katika chujio kubwa. Mtunzi ukifikisha tungo yako kwenye kundi lako, bendi, taarab au kwaya, watu wa kwanza kuanza kuukosoa au kukusifu  walikuwa wenzio katika kundi, kisha hawa hukusaidia kuuboresha na kila mtu kushiriki katika kuufanikisha,  mpiga solo alitunga mapigo yako yake, mpiga bezi nae, wapulizaji na kadhalika, na kila mmoja alikuwa anauwezo wa kutoa ushauri kuhusu sehemu yoyote ya wimbo. Hatimae kama kundi hufikia mahali na kuridhika kuwa kazi yao sasa inaweza kutolewa kwa umma.  Katika bendi zote nilizopitia, siku ya kuupiga wimbo kwa mara ya kwanza ilikuwa muhimu, kwani wanamuziki wote kwa ujumla mlikuwa na kazi mbili, kwanza kupiga kwa ufasaha tungo yenu mpya na pili kuangalia washabiki wenu wanaichukuliaje nyimbo yenu mpya. Kama wimbo haukupokelewa vizuri na mashabiki wenu, ulikuwa unarudi tena jikoni, kuliwekwa  hata vikao vya kujiuliza kwanini watu hawakuuchangamkia wimbo. Na kama ingeonekana kuwa wimbo umefurahiwa na wapenzi wenu, basi ungeendelea kupigwa kwenye kumbi hata mwezi mmoja zaidi kwa kile tulichokiita ‘wimbo uive’. Baada ya hatua hii ndipo mipango ya kurekodi wimbo huanza kufanyika. Na kwa miaka hiyo kulikuwa na chujio jingine, tungo zilipelekwa mapema Radio Tanzania ambako ndiko kulikuwa na studio za kurekodi, na huko kulikuweko na kamati iliyokuwa ikiangalia kama tungo zimefuata maadili yaliyokuweko wakati huo. Tungo zilizopita chujio hilo ndizo zilizorekodiwa. Na hakika ndizo nyimbo ambazo zingine zina miaka zaidi ya  hamsini lakini zinafurahiwa na wapenzi wa muziki wa rika zote hadi leo.
 Kwa utaratibu wa sasa, ni kawaida msanii kutunga wimbo wake chumbani kwake peke yake, kisha akaingia studio, wakawa watu wawili yeye na producer wake na kutengeneza wimbo ambao ukitoka hapo unapelekwa redioni tayari kwa kurushwa kwa umma. Lakini katika zama hizi ambazo kwanza kuna tatizo kubwa la malezi, ambapo si ajabu kusikia mzazi akimtusi mwanae wa kumzaa kwa matusi ambayo kimsingi anajitukana mwenyewe, mtaani watoto wanakua wakisikia lugha za ajabu na hakuna mtu anaonekana kushtuka, hakika msanii aliyekulia katika mazingira haya na  kwa kuwa yeye ni ‘kioo’ cha jamii yake, kazi yake si ajabu kabisa unapokuta akiongelea mambo ambayo mtu mwingine unastaajabu kapata wapi ushujaa wa kutamka maneno ya faragha bila ukakakasi mdomoni. Kazi za namna hii ni nadra sana kuwa na maisha marefu


Mshindi wa Singeli Michano ya EFM Mwanza apatikana

> Watanzania jana waliadhimisha kumbukizi ya miaka 18 tangu kufariki dunia kwa mwasisi wa taifa la Tanzania, Hayati Mwl.Julius Kambara...