Friday, April 5, 2013

PRODUCER MANEKE...MUZIKI UMO KWENYE DAMU YAKE KIUKWELI


MANEKE

MZEE SEWANDO
Mara nyingi sana utasikia mwanamuziki akidai kuwa muziki uko ndani ya damu yake, akiulizwa zaidi unaanza kusikia hadithi isiyo na kiungo kuhusu jambo hilo, katika blog hii hii niliongelea kuhusu Vanesa Mdee na kuelezea jinsi alivyokuwa anafanana kimuziki na baba yake mdogo ambaye sasa ni marehemu ingia VANESSA kwa habari hiyo. 
Leo nitaongelea msanii mwingine kabisa ambaye yeye ni msaada mkubwa kwa wanamuziki wengi wa Bongofleva na jinsi muziki ulivyo kweli kwenye damu yake. Emmanuel Sewando alizaliwa saa 5 usiku mkesha wa mwaka mpya, tarehe 31 Desemba 1988, kwa wazazi ambao walikuwa na uhusiano mkubwa na sanaa. Mama yake ni Afisa utamaduni mpaka leo, wakati  baba  yake Emmanuel, Mzee Sewando, alianza kupenda muziki toka yupo kidato cha pili  katika shule ya sekondari ya Kwiro. Ila kwanza alianza kuwa fundi mitambo wa bendi akapewa jina la The Mad Scientist na wenzie. Mwaka 1969 bendi yao iliweza kurekodi kwa mara ya kwanza RTD ikiwa na mtindo wao wa Mahoka, ambao baadae ulitekwa na Morogoro Jazz na kuja kutumiwa na bendi hiyo 1972. Wakati akiwa fundi mitambo akaanza kujifunza gitaa, mwenyewe anasema baada ya kuona anaweza kupiga vyombo kadhaa vya kiasili kama marimba, filimbi akageukia gitaa, japo hapo shuleni kwao vilikuwepo vyombo vyote vya muziki. Mwaka 1970 akahamia Mkwawa High School ambapo alikuta kuna magitaa ya TANU Youth League bila amplifier, the Mad Scientist sio tu akatengeneza amlifier lakini pia akatengeneza transmitter, ikawa wakati bendi inafanya mazoezi wanafunzi katika mabweni walikuwa wanaweza kusikiliza katika redio zao. Na Mkwawa akendelea sana kupiga gitaa akiwa na wenzie huku akiendelea kuwa fundi mitambo. Lakini turudi kwa mtoto Emmanuel, huyu amekuwa Producer maarufu ambaye amekwisha chukua tuzo kadhaa za muziki, na kuweza kuwatengenezea wasanii chungu nzima muziki, nae anajulikana kwa jina la Maneke wa AM Records. Jina Maneke ni jina la babu yake ambalo kwa sasa limechukua kabisa  nafsi ya jina lake halisi la Emmanuel. Blog hii inasema,Keep up the good work.
 Na habari za uhakika zina sema kuwa mtoto mwingine wa Mzee Sewando nae yuko mbioni kuweka alama yake katika muziki wa hapa Tanzania





JE UNATAKA BENDI YAKO IFANYE ONYESHO ZURI ?- SOMA HAPA


Hakuna siri  kuwa kwa bendi yoyote ‘live’ni moja ya mambo muhimu katika kazi mwanamuziki kwa sababu mbili. ‘Live’ ni chanzo muhimu cha mapato ya bendi na promo kubwa katika kuongeza mauzo na CD na DVD za bendi. Kwa sababu hii lazima lengo la kila show iwe ni kuhakikisha kusimamia na kulinda ubora wa kazi bendi inayofanya. Ubora wa onyesho hujenga mahusiano chanya na kumbi ambapo bendi hufanya maonyesho hapo ni kuongezeka kwa fursa za mapato zaidi. Mambo muhimu ni ya kuanza nayo ni matayarisho ya maonyesho. Matangazo ni muhimu sana, tuma mabango mengi mapema, ikiwezekana katika zama hizi tumia vyema Facebook na Tweeter kufikisha ujumbe wa onyesho. Hakikisha vyombo vya utangazaji vinapata matangazo bila kuweka ubaguzi katika matangazo kwa vyombo fulani tu, inaweza ikakuletea matatizo ya kukosa watu kwa kuwa tu umetangazwa na chombo fulani, katika enzi hizi za ‘Mabif’ si busara bendi kujikuta katikati ya Bif ambalo bendi haihusiki. Toa taarifa za maendeleo ya matayarisho yote  ya onyesho kwa waandishi kila mara. Tuma CD au DVD za muziki wako kwenye vituo vya redio na TV vyote vya mji unaokwenda kupiga muziki, bila kusahau kwenye ukumbi utakao piga, ili wazipige sana kabla bendi haijafika. Bendi ifanye utafiti, na kujua inakokwenda wanapenda kusikia nini? Kuna utani wa eneo lile? Mkasa wa kuchekesha wa lile eneo? Yajulikane na kutumiwa kwenye maonyesho.
Bendi ihakikishe inawahi kwenye maonyesho, hakuna kitu kinaudhi watu kama wateja kufika kwenye ukumbi na kukuta wasanii hawajafika. Kuwahi kufika kunasaidia kucheki kama vyombo viko sawa ili muda ulioandikwa wa kuanza onyesho usiwe muda wakuanza kutengeneza vyombo.
Onyesho lilikanza liwe moto chini, hata kama hakuna watu,  muziki upigwe kama watu wamejaa kibao, ikifanywa show kwa unyonge hata wale waliokuja hawatarudi, lakini show nzuri inaweza kukuhakikishia kupewa nafasi ya kufanya onyesho tena na habari zitasambaa kuwa onyesho lilikuwa safi. Kuwa rafiki na heshimu kila mtu, wasanii wengi hukosea hapa na kujiona nusu Miungu, wakisahau kuwa waliokuja kwenye show ndio wanaokupa unusu Mungu. Kabla ya show ni muhimu wanamuziki kula vizuri, pombe kila mara ni hasara, bahati mbaya wasanii wengi hudhani kuwa ni stimu kidogo inawasaidia kazi, hilo liko kichwani tu ukweli si huo,na kiwango cha stimu huongezeka kila mara, mwanamuziki anaeanza show na bia mbili leo atajikuta analazimika kunywa Konyagi mbili miezi michache baadae. Hakuna mtu  mwenye akili anaingia ofisini na pombe kichwani  kwa nini mwanamuziki uingie ofisini kwako na pombe kichwani? Muhimu sana bendi kutayarisha nyimbo za kuanzia show, nyimbo kama tano au nne kwa lile saa la kwanza la onyesho, bahati mbaya sana bendi siku hizi zinawea kupiga wimbo mmoja kwa saa nzima huu ni ujinga, nani anaweza kucheza saa nzima?  Muhimu kuangalia mapokezi ya watu kwa hizo nyimbo za mwanzo na kiongozi kutengeneza nyimbo nne za saa inayofuata na kuendelea hivyo, muziki unapigwa kufuata matakwa ya watu, bendi nyingi zisizo na msimamo huenda hovyohovyo hata wanamuziki wakigombea nyimbo zao zipigwe bila kujali wateja wanataka nini, onyesho lazima liwe baya hata kama mnajua kupiga vipi. Bendi ikipanda jukwaani wote ni wamoja na marafiki, matatizo mnayaacha nje, mwiko, nasema mwiko wanamuziki kutwangana jukwaani.
 Lazima kila mwanamuziki awe anaweza kujisikia chombo chake mwenyewe na kusikia wenzie hasa bassist, kwani yeye ndie anayeiunganisha bendi pamoja katika jukwaa na ndie anaeshika mkong’osio wa bendi. Kiongozi wa bendi ndie anaeongoza bendi inaenda vipi, siyo kila mtu kuamua lake. Hakuna kitu kinaudhi kama kuangalia wanamuziki wanabishana nyimbo gani ya kupiga wakati watu wakingojea utamu ambao wamelipia. Mwenye kuelewa na aelewe

TARATIBU ZA KUJIUNGA NA COSOTA