-->
Katika
siku za karibuni wanamuziki kadhaa wa Tanzania wamekuwa wakija na nyimbo mpya wakiiga ‘beat’ za
kutoka Nijeria. Ningependa kuwapa taarifa fupi kuhusu 'beat' hizo. Katika nchi za
Afrika Magharibi, hasa Ghana na Nigeria, kwa miaka mingi walikuwa na mtindo wao wa Highlife ambao
vijana wa huko wameuendeleza na kuwa mtindo ambao unatamba sana Afrika, na si mara
moja wamerudia nyimbo za zamani na kutikisa Afrika, wimbo kama Sawa
saware ambao uliandikwa na Rex Lawson mzee wa Kinaijeria aliyefariki mwaka
1971, ni wimbo ambao mzee huyo alianza kuupiga miaka 50 iliyopita, umechukuliwa na vijana na kupewa umri mpya kwa kuuboresha bila kuuharibu, au ukiusikiliza wimbo
Sweet Mother wa Prince Nico Mbarga ambao ulitikisa Afrika kwa kufanya mauzo ya zaidi ya santuri milioni 13, utakuta pia vijana wa
Kinaijeria wamechukua utaalamu wa mapigo hayo na kuja na mtindo unaotikisa Afrika.
Ushauri wangu ni kuwapa hamasa vijana wanamuziki wa Tanzania kuwa kuna ghala
limejaa 'beat kali' katika historia ya muziki wa nchi hii pia, ukijumlisha na ‘beat’
za makabila zaidi ya 120 utaona kuwa bado kuna silaha kibao za kuweza kutumia ili kuingia
katika mpambano wa kutafuta nafasi katika soko la muziki la kimataifa. Lazima hapa niwasifu
wale vijana ambao wameligundua hili na tayari nimekwisha sikia nyimbo kadhaa
zenye 'beat' za Kizaramo, safi sanaaa, pia nawashauri kaangalieni Sangula la Wapogolo mpate mambo mapya kule. Producers
fanyeni homework ili kupata beat mpya za ubunifu wenu asili. Naambatanisha
wimbo original wa Sawa saware muone kazi ilivyokuwa awali
Comments