Wakati
wa Top Ten Show, onyesho lililokuwa kubwa sana la mashindano ya bendi, ambapo
bendi kutoka mikoa yote zilipata nafasi sawa za kuonyesha uwezo wao na hatimae
kuchaguliwa Bendi Bora, vikundi vya muziki wa Taarabu havikushirikishwa kwa kuwa vilikuwa vikipiga muziki
tofauti na bendi za muziki wa dansi, palikuweko hata malalamiko kutoka kwa
baadhi ya bendi ya kupinga kundi la Varda Arts ambalo lilikuwa likipiga muziki
wake kufuatia mirindimo ya Kihindi kushiriki katika shindano hili. Hata vyama
vya muziki wa Taarab na muziki wa dansi vilikuwa tofauti. CHAMUDATA (Chama cha Muziki wa Dansi Tanzania) kwa ajili
ya muziki wa ‘dansi’ na TTA (Tanzania Taarab Association) kwa ajili ya muziki
wa Taarab. Mambo yamebadilika sana siku hizi, sioni hata sababu ya kuwa na
vyama viwili kwa kuwa tofauti za kimuziki za makundi haya zimepotea
sana
Kila nikiingia katika kumbi mbalimbali kuangalia na
kuburudika na kazi kutoka vikundi
vinavyojitambulisha kuwa ni vya Taarab na vile vinavyojitambulisha kuwa ni vya
dansi, napata maswali mengi kichwani, na kwa kweli naona makundi haya mawili
yamebadilishana nafasi.
Muziki
wa Taarab ulikuwa na sifa ya kuwa aina ya muziki wa kusikiliza ujumbe wake,
wapenzi wake na hata wanamuziki walikuwa wamekaa na kutulia na kutafakari
ujumbe unaotolewa, wakati muziki wa dansi ulikuwa ukijulikana kwa mirindimo
ambayo ingekufanya usimame ucheze. Sio siri siku hizi unaweza kuingia kwenye
kundi la muziki wa dansi zikapigwa nyimbo
hata tatu, usione watu wanasimama na kucheza, lakini wanasikiliza
muimbaji anasema nini, na kumtuza muimbaji kwa anachoimba. Wote tunafahamu kuwa
kwa sasa kuna tuzo hata za ‘Rapa” bora, ambaye ubora wake unatokana pia na
maneno atakayotamka.
Katika Taarab mambo yamebadilika, wimbo
ukianza ukumbi hujaa watu wakicheza, kila mtu kwa staili yake, na siku hizi
hata makundi mengine ya Taarab yana vijana wanaonyesha namna ya kucheza wimbo husika. Ile staili ya zamani
katika bendi ya kuachia gitaa la rhythm lipige peke yake imehamia kwenye taarab
ambapo gitaa huachwa likipiga , tena mara nyingine vipande vya nyimbo za bendi
za zamani, na watu hufurahi sana. Kwa leo sitaki kuingia katika malumbano
yanayoendelea ya wapenzi wa Taarab asili wakisema wazi kuwa kinachoendelea
katika vikundi vinavyotambulika kama ni vya Taarab si Taarab hapana hilo
nitalisema siku nyingine,leo nataka wanamuziki wa muziki wa dansi wajiulize je
wameacha kupiga muziki wa dansi na siku hizi wanapiga muziki wa kusikiliza tu?
Pamoja
na kuwa muziki unakosa wachezaji kwenye ukumbi kuna swala la wacheza show
kuchukua muda mwingi kucheza na tena kucheza katika eneo ambalo awali lilikuwa
ni la wapenzi wa dansi, jambo ambalo linadhihirisha wazi kuwa hata wanamuziki
wenyewe wameamua kuwa wao lengo lao si kuwafanya wapenzi wacheze bali waangaliwe
wao umahiri wa kulisakata rumba.
Ni
vizuri basi kubadili jina na kuacha kujiita bendi za muziki wa dansi, na
kuwaachia wanamuziki wa muziki wa Taarab sifa hiyo
Nakumbuka
zamani, wakati wa kutunga nyimbo wanamuziki wa muziki wa dansi walikuwa wakijiuliza ‘Je, wimbo huu
unachezesha?’, na wimbo ulikuwa hautolewi hadharani kama wanaona hautahamasisha
kucheza, na hata kama waliridhika katika mazoezi kuwa ‘unachezesha’ ikiwa baada
ya kupiga mara moja au mbili kwenye ukumbi ukaonekana ‘hauchezeshi’ wimbo ulirudi
tena kwenye mazoezi.
Kunahaja
kubwa ya wanamuziki wa dansi kujiuliza swali’ Wanapiga ili kusikilizwa au watu
wacheze?
Comments